Эмомалӣ Раҳмон: “Суботу оромии ҷомеа ба муносибати ҳар яки мо алоқаманд аст ва набояд ба масъалаҳои вобаста ба ҳифзи манфиатҳои давлату миллат бетарафӣ зоҳир намоем”

Душанбе, 21.10.2015. (АМИТ “Ховар”). – Президенти Ҷумҳурии  Тоҷикистон Эмомалӣ Раҳмон зимни мулоқот бо роҳбарону фаъолони вилояти Суғд аз шомилшавии сокинони вилоят ба ҳар гуна ҳизбу ҳаракатҳои ифротию террористӣ изҳори нигаронӣ карда, иттилоъ дод, ки ҳоло 169 нафар сокинони шаҳру ноҳияҳои вилояти Суғд бо аҳли оилаи худ дар урдугоҳҳои махсуси давлатҳои хориҷӣ, аз ҷумла дар Сурия, Ҷумҳурии Исломии Афғонистон ва Ҷумҳурии  Исломии  Покистон қарор  доранд.
Ҳамзамон бо ин, то ҳанўз 213 нафар сокинони вилоят — аъзои ҳизбу ҳаракат ва равияҳои экстремистӣ барои иштирок дар  муқовиматҳои мусаллаҳонаи давлати Сурия дар кофтуков қарор доранд. 
“Дар иртибот ба масъалаҳои зикршуда таъкид менамоям, ки кормандони мақомоти ҳифзи ҳуқуқ, роҳбарону масъулони мақомоти иҷроияи маҳаллии ҳокимияти давлатӣ, фаъолони ҷомеа ва ҳар як фарди ватандўсти кишвар вазифадоранд, ки барои пешгирӣ аз ҷалби сокинон, хусусан наврасону ҷавонон ба сафи ҳаракату гурўҳҳои тундгарову экстремистӣ, инчунин дар самти баргардонидани ҳамватанон аз кишварҳое, ки дар онҳо задухўрдҳои мусаллаҳона ва низоъҳои диниву мазҳабӣ ҷараён доранд, саҳми худро дареғ надоранд. Зеро суботу оромии ҷомеа, пеш аз ҳама, ба муносибати ҳар яки мо алоқаманд аст ва мо набояд ба масъалаҳои вобаста ба ҳифзи манфиатҳои давлату миллат бетарафӣ зоҳир намоем”, — таъкид дошт Сарвари давлат Эмомалӣ Раҳмон.