Футболбозони «Ҷоҳор» ба Душанбе омаданд

Душанбе, 29.10.15. (АМИТ «Ховар»). — Ҳайати  клуби «Ҷоҳор  Дарул Такзим»  барои  иштирок дар   вохӯрии  ниҳоии  Ҷоми  КФО  — 2015 бо  қаҳрамони  секаратаи  Тоҷикистон  дастаи «Истиқлол» — и пойтахт  ба  шаҳри  Душанбе омад. 
Тавре  ки  дар Федератсияи  футболи  Тоҷикистон   хабар  доданд,  сармураббии «Ҷоҳор»  Роберто  Карлос Марио  Гомес  23  нафар  бозингаронро  бо  худ  ба  шаҳри  Душанбе овардааст,  ки дар  байни онҳо  4  нафар  футболбозони  Аргентина,  Бразилия  ва  Сингапур  ҳастанд.
Ёдовар  мешавем, ки вохӯрии  ниҳоии  Ҷоми  КФО — 2015  байни  қаҳрамони  секаратаи  Тоҷикистон   дастаи «Истиқлол» — и  шаҳри  Душанбе  ва қаҳрамони  дукаратаи  Малайзия  «Ҷоҳор  Дарул  Такзим»  соати 16:00  рӯзи  шанбеи  31  октябр  дар Варзишгоҳи  марказии ҷумҳуриявӣ баргузор  мешавад.