Иштироки ҳайати Тоҷикистон дар иҷлосияи Форуми ҳамкории Ҷумҳурии Корея — Осиёи Марказӣ

Душнабе, 05.10.2015 (АМИТ «Ховар»).- 5 октябри соли 2015 дар Сеул иҷлосияи 9-уми Форуми ҳамкории Ҷумҳурии Корея — Осиёи Марказӣ баргузор гардид, ки дар кори он ҳайати Ҷумҳурии Тоҷикистон бо роҳбарии муовини вазири корҳои хориҷӣ Низомиддин Зоҳидӣ ширкат варзид. Дар маросими ифтитоҳи форум роҳбари ҳайати Ҷумҳурии Тоҷикистон сухан гуфта, таваҷҷуҳи Тоҷикистонро ба рушди ҳамкории гуногунҷанба дар доираи форум ва истифодаи имконоти онро дар таҳкими ҳамкорӣ ва рушди устувор дар минтақа таъкид намуд.
Дар доираи форум ҷаласаи махсус оид ба масъалаи ниҳодина кардани ҳамкорӣ миёни кишварҳои Осиёи Марказӣ ва Ҷумҳурии Корея баргузор гардид. Иштирокдорони ҷаласа тасмим гирифтанд, ки гурӯҳи кориро доир ба масъалаи таъсиси котиботи Форуми ҳамкорӣ ташкил кунанд.
Дар чаҳор ҷаласаи алоҳидаи форум масъалаҳои иттилооти ҳудудӣ марбут ба кадастри замин, захираҳои фарҳангӣ, маъмурияти гумрукӣ ва тандурустӣ мавриди баррасӣ қарор гирифтанд.
Иштирокдорони форум аҳамияти муҳокимаҳои баргузоршударо таъкид намуда, татбиқи лоиҳаҳои мушаххасро, ки манфиатҳои умумии кишварҳои узви форумро таҷассум мекунанд, зарур шумориданд.
Дар интиҳои форум Баёнияи Сеул қабул карда шуд.
Дар доираи форум мулоқоти муовини вазири корҳои хориҷӣ Н. Зоҳидӣ бо муовини аввали вазири корҳои хориҷии Ҷумҳурии Корея Чо Тэ-ёнг баргузор гардид.
Ҷонибҳо масъалаҳои рушди муносибатҳои дуҷонибаро мавриди баррасӣ қарор дода, манфиатдории муштараки худро ба истифодаи имконоти зиёди ҳамкорӣ дар соҳаҳои мухталиф изҳор намуданд. Дар мулоқот ҳамчунин имконоти тавсеаи заминаи шартномавӣ-ҳуқуқии муносибатҳои дуҷониба ва масъалаҳои дигари мавриди эҳтимоми тарафайн муҳокима шуданд.