Масоили рушди ҳамкорӣ дар бахши иқтисодиёт баррасӣ мешавад

Душанбе, 26.10.15. (АМИТ «Ховар»). —  30  октябр дар  шаҳри  Душанбе  ҷаласаи Шӯрои Сарони ҳукуматҳои  Иттиҳоди Давлатҳои  Мустақил  баргузор  мегардад.
Тавре  ки  дар  дафтари  матбуоти Кумитаи иҷроияи  ИДМ  хабар  доданд,  иштирокдорони  ҷаласа  масоили марбут  ба  рушди ҳамкорӣ  дар  бахши  иқтисодиёт, аз ҷумла татбиқи Шартнома  дар  бораи  минтақаи тиҷорати озод,  фаъолияти мақомоти соҳавӣ дар  бахши  иқтисодиёт, иқдомот  ҷиҳати   татбиқи марҳалаи  сеюми Стратегияи  рушди  иқтисодии ИДМ,  масоили  ҳамкорӣ  дар  бахши  навоварӣ, рақобати  бозорҳои  амвол, мухобираи  барқӣ, энергетика ва  бозори қоғазҳои қиматбаҳоро мавриди  мухоқима қарор  медиҳанд.
Ғайр  аз ин,  сарони  ҳукуматҳо  ҳуҷҷатҳои  тарғибкунандаи  ҳамкорӣ   дар  бахши тарбияи  ҷисмонӣ  ва  варзиш, ҳамкории  байналмилалии  ҷавонон, таҳсилот, ёрии тиббию  иҷтимоӣ  ба  собиқадорон,  ҷилавгирӣ  ва  рафъи оқибати   ҳолатҳои  фавқулодда ва бехатариро  баррасӣ  менамоянд.