Мулоқоти Ҳ. Зарифӣ бо намояндагони Донишгоҳи байналмилалии тиббии Япония

Душанбе, 24.10.2015. (АМИТ «Ховар»). – Сафири Фавқулода ва Мухтори Ҷумҳурии Тоҷикистон дар Япония Ҳамрохон Зарифӣ бо Мушовири калон оид ба корҳои академикӣ, профессори аспирантураи Донишгоҳи байналмилалии тиббии Япония, узви “IHW group” ҷаноби Тэйичи Сато ва мудири шуъбаи котибот, муносибатҳои байналмилалии Донишгоҳи мазкур ҷаноби Ёшиҳито Ҳаттори мулоқот кард. 
Зимни мулоқот ҷонибҳо масъалаҳои ҳамкории Донишгоҳи давлатии тиббии Тоҷикистон ба номи Абуалӣ ибни Сино ва Донишгоҳи байналмилалии тиббии Япония, табодули донишҷӯён ва ҳамкорӣ байни беморхонаҳои Тоҷикистон ва Японияро муҳокима карданд.
“IHW group” дар ҳайати худ чандин донишгоҳҳои байналмилалии тиббӣ, беморхонаҳо дар Япония ва хориҷи кишвар, аз он ҷумла, Чин, Ветнам, Миянмар ва дигар кишварҳо дорад.
Ҳамзамон, аз Роҳбарияти “IHW Group” хоҳиш карда шуд, ки ҳамкории зичро бо Тоҷикистон роҳандозӣ намоянд.