Ноуҳдабароии ронандагон боиси ҳодисаҳои нохуш мегардад

Душанбе, 02.10.2010 (АМИТ «Ховар»).- Тайи ду рӯзи охир кормандони Раёсати БДА ВКД ҷумҳурӣ ҳодисаҳои  нохушеро ба қайд гирифтанд, ки аз ноуҳдабароии ронандагон дониста мешавад.
Бино ба иттилои Вазорати корҳои дохилии кишвар, рӯзи 30-юми сентябр ронандаи мошини тамғаи “Опел-Астра”, сокини 24-солаи ноҳияи Қумсангир, ҳангоми ҳаракат аз шаҳри Қурғонтеппа ба самти ноҳияи Қумсангир дар ҳудуди ноҳияи Ҷ. Румӣ бехатарии ҳаракат дар роҳро таъмин карда натавониста, велосипедрон, сокини 52-солаи ноҳияи Ҷиликулро пахш намудааст. Дар натиҷа велосипедрон ҷароҳатҳои вазнини ҷисмонӣ бардошта, дар ҷои ҳодиса ба ҳалокат расидааст. 
Ҳамчунин дирӯз, 1-уми октябр, ронандаи мошини тамғаи “Опел-Астра”, марди 38-солаи сокини ноҳияи Тоҷикобод, ҳангоми ҳаракат дар шоҳроҳи Ваҳдат-Рашт дар ҳудуди деҳаи Сари пули ҷамоати деҳоти Нушор аз уҳдаи идораи мошин набаромада, духтарчаи 6-солаи сокини ҳамин деҳаро пахш намудааст. Дар натиҷа, духтарчаи хурдсол ҷароҳатҳои вазнини ҷисмонӣ бардошта, дар беморхона ба ҳалокат расидааст.