Озодсозии минтақаҳо аз ихтиёри террористҳои ДИИШ оғоз гардид

Душанбе, 09.10.2015. (АМИТ «Ховар»).- Мақомоти баландпояи артиши Сурия аз тақвияти ҷабҳаи муқовимат аз заиф гардидани террористҳои ДИИШ дар натиҷаи ҳамлаҳои ҳавоии Русия хабар доданд. 
Хабаргузории расмии Сурия «Сано» ба нақл аз сарлашкар Алӣ Абдуллоҳ Айюб, раиси ситоди кулли неруҳои мусаллаҳи Сурия гузориш дод, ки дар натиҷаи ҳамлаҳои ҳавоии Русия ба зерсохторҳои ДИИШ ва заиф гардидани ин гурўҳи террористӣ, неруҳои мусаллаҳи Сурия ташаббусро ба даст гирифтанд.
Бар асоси ин гузориш, бо боло рафтани тавони таҷҳизотии артиш ва шаклгирии «Лашкари ҳуҷумии чорум», неруҳои мусаллаҳи Сурия ҳамлаҳои густардаи худро барои озодсозии минтақаҳое, ки таҳти ихтиёри террористҳо қарор доранд,оғоз карданд.
Дар ҳамин ҳол тибқи гузориши «Ал-Ғадир»-и Ироқ Артиши Сурия рўзи гузашта бо пуштибонии неруҳои ҳавоии ин кишвар ва ҳавопаймоҳои Русия шаҳракҳои Латмин, Маъракаба, Атшон, Ал-Ҳавир, Ал-Муғир, Тал-Ассухр ва Тал-Усмон-ро дар шаҳри Ҳумои ин кишвар озод карданд.