Президенти кишвар: «Барои иштирок дар лоиҳаҳои сармоягузорӣ бо ширкатҳои хориҷӣ рақобатпазир бошед»

Душанбе, 14.10.2015. (АМИТ «Ховар»). — Сарвари давлат Эмомалӣ Раҳмон имрӯз  зимни суханронӣ дар Форуми байналмилалии соҳибкории Душанбе-2015 бо ёдоварӣ аз лоиҳаҳои сершумори давлатӣ ва минтақавию байналмилалӣ аз соҳибкорони ватанӣ даъват намуд, ки барои иштирок дар онҳо бо ширкатҳои хориҷӣ рақобатпазир бошанд, зеро дар чанд соли охир дар соҳаи пешбурди соҳибкорӣ ва ҷалби сармоя як силсила ислоҳот, ки ба беҳтар намудани фазои сармоягузорӣ,  кам кардани монеаҳои маъмурӣ ва дахолати давлат ба фаъолияти хоҷагидории субъектҳои соҳибкорӣ равона гардидаанд, анҷом дода шуданд.
Барои ба талаботи меъёрҳои байналмилалӣ мутобиқ гардонидани фазои сармоягузорӣ, рушди бахши хусусиву соҳибкорӣ ва ҳамгироӣ бо иқтисоди ҷаҳонӣ, ки аз ҳадафҳои муҳими Ҳукумати Тоҷикистон ба шумор мераванд, чораҳои ҷиддӣ андешида шуда, дар кишвар шароити озоди рақобат фароҳам оварда шудааст ва аз лиҳози ҳимояи ҳуқуқӣ байни шахсони ҳуқуқиву воқеии дохилӣ ва хориҷӣ ягон фарқияти ҷиддӣ вуҷуд надорад,-таъкид намуд Сарвари давлат Эмомалӣ Раҳмон.