Таъсиси гурӯҳи роҳбаладони ҷавон дар Ҳисор

Душанбе, 26.10.2015 (АМИТ «Ховар»).-Чанде пеш бо иштироки роҳбарияти муассисаҳои олии таълимӣ, субъектҳои хоҷагидори соҳаи туризм оид ба масъалаҳои рушди самараноки фаъолияти туристӣ дар Қалъаи Ҳисор семинари омўзишӣ  доир гардид.
Семинари мазкур бо дастгирии Кумитаи ҷавонон, варзиш ва сайёҳӣ дар ҳошияи баргузории 3000-солагии ноҳияи Ҳисор  бо мақсади иҷрои босамари Нақшаи чорабиниҳо оид ба муаррифии имкониятҳои туризми дохилии Ҷумҳурии Тоҷикистон дар соли 2015 гузаронида шудааст. 
 Дар ин замина барои хизматрасонӣ ба меҳмонони дохиливу хориҷӣ дар Қалъаи Ҳисор аз ҳисоби донишҷӯёни риштаи туризми Донишгоҳи тиҷорат ва Донишкадаи соҳибкорӣ ва хизмати Тоҷикистон гурӯҳи роҳбаладони ҷавон иборат аз 20 нафар, ки бо забонҳои хориҷӣ озодона суҳбат мекунанд, таъсис дода шуд.
Ҳадаф аз чорабинии мазкур- ин андешидани тадбирҳои судманд барои тарғибу ташвиқи захираҳои туристии Тоҷикистон, инчунин ҷалб намудани ҷавонон ба соҳаи туризм ва омодасозии кадрҳои соҳаи туризм, алалхусус роҳбаладҳо дар макотиби сатҳи олӣ мебошад.