Темурмалик: ҷамъияти матлубот миқдори зарурии ангиштро захира кардааст

Темурмалик, 31.10.2015 (АМИТ «Ховар»).- Корхонаю ташкилот ва муассисаҳои ноҳияи Темурмалик ба маъракаи зимистонгузаронӣ омодагӣ гирифтаанд. Раёсати ҷамъияти матлуботи ноҳия барои таъмини муассисаҳо миқдори зарурии ангишт ворид намудааст. Дар шабакаҳои барқи ноҳия низ охирин корҳои таъмирӣ ҷараён дорад. Кормандони ин муассиса то имрӯз ҳамаи зеристгоҳҳо ва хатҳои барқиро аз таъмир бароварда, миқдори зарурии таҷҳизоти соҳавиро захира кардаанд.  Ба  гуфти Зайниддин Асомиддинов — сардори шабакаҳои барқӣ дар айни замон дар зеристгоҳи 35 ба 10 киловолтаи ноҳияи Темурмалик кормандони шабакаҳои барқи минтақаи Кӯлоб охирин корҳои таъмириро ба иҷро расонида истодаанд. Дар муассисаҳои тандурустии ноҳия миқдори зарурии ҳезуму ангишт ва сӯзишвории дизелӣ барои муҳаррикҳои барқдиҳанда захира шудааст. Беморхонаи марказӣ бо хатти тозаи барқ таъмин буда, дар шуъбаҳо муҳаррикҳои барқдиҳанда насб гардидаанд. Дигар корхонаю ташкилоти ноҳияи Темурмалик, аз ҷумла шуъбаҳои фарҳанг ва маориф низ бо ангишту ҳезум таъмин  шудаанд.