Зилзила дар кишварҳои ҳамсояи Покистон, Ҳиндустон, Қирғизистон, Тоҷикистон, Озарбойҷон ва Қазоқистон эҳсос гардид

Душанбе, 26.10.2015. (АМИТ «Ховар»). -Дар  Афғонистон бар асари зилзилаи сахте, ки имрӯз соати 14.09 вақти маҳаллӣ бо қувваи 7,5 бал ба амал омад, дастикам панҷ нафар ҳалок гардида, 55 нафари дигар ҷароҳат бардоштаанд.  Дар ин бора Агентии Рейтер бо такя ба суханони роҳбари музофоти Нангарҳор,  воқеъ дар сарҳади Покистон  хабар медиҳад.   
Пештар хабар дода шуд, ки дар натиҷаи зилзила панҷ кӯдак дар музофоти Бағлон дар қисмати шимолу шарқии Афғонистон  ҷароҳат бардоштаанд. 
Ёдовар мешавем, ки заминҷунбӣ бо қувваи 7,5 бал рӯзи душанбе, 26 октябр  соати 14.09 вақти маҳаллӣ дар Афғонистон рух дод. Маркази зилзила дар умқи 212,5 километр дар километри 45-уми қисмати ҷанубу ғарбӣ аз шаҳри Ҷурм ҷойгир будааст.  Ларзишҳои зеризаминӣ  дар кишварҳои ҳамсояи Покистон, Ҳиндустон, Қирғизистон, Тоҷикистон, Озарбойҷон ва Қазоқистон эҳсос гардиданд. 
Тавре ки манбаъ хабар медиҳад, аз зилзила 13 сокини Покистон ҳалок ва қариб 300 нафар  бар асари фурӯ рафтани хонаҳо ҷароҳат бардоштаанд.