Ҷаласаи Шӯрои роҳбарони мақомоти муҳоҷирати давлатҳои аъзои ИДМ

Душанбе, 27.11.15. (АМИТ «Ховар»). — Дар  шаҳри  Санкт — Петербург  ҷаласаи ҳаждаҳуми Шӯрои роҳбарони мақомоти  муҳоҷирати давлатҳои  аъзои  ИДМ баргузор  гардид. Роҳбарони мақомоти муҳоҷирати  кишварҳои  ИДМ  дар  шароити  бӯҳрони  умумиҷаҳонии  муҳоҷират кори  муштаракро  идома  медиҳанд, ки  он ба муайян  намудани муносибатҳои  умумӣ ба  масоили  муҳоҷирати ғайриқонунӣ ва таъмини  ҳуқуқҳои  гурезаҳо мусоидат  мекунад. 
Дар  ҷаласа Эъломияи муштараки Шӯрои  роҳбарони мақомоти  муҳоҷирати  давлатҳои  аъзои  ИДМ  маъқул  ёфта  шуд. Дар  ҳуҷҷат  зикр  мешавад, ки  фаъолияти қонунии  меҳнатии  муҳоҷирон,  донистани  забон,  асосҳои  қонунгузорӣ, анъанот ва  фарҳанги ҷомеаи пазиранда ҳамгироии  муваффақонаи  муҳоҷирон  ба  шумор  меравад.
Ғайр  аз  ин,  дар  эъломия нияти  кишварҳо  барои  муайян  кардани  муносибатҳои  умумӣ ба  масъалаҳои  одат  намудан  ба низоми иҷтимоию  фарҳангӣ ва  ҳамгироии  муҳоҷирон  дар  ҷомеаи  пазиранда инъикос  ёфтааст. 
Ёдовар  мешавем, ки  Шӯрои роҳбарони мақомоти  муҳоҷират  моҳи  октябри  соли  2007 ба  манзури  таъмини суботу амнияти  сарҳадот ва  танзими   равандҳои  муҳоҷират   дар  давлатҳои  аъзои  Иттиҳоди  Давлатҳои  Мустақил  таъсис  ёфт.