Бозёфтҳои бостоншиносон аз Фархор ба нигораҳои Саразм шабоҳат доранд

Фархор,10.11.2015. (АМИТ  «Ховар»).-Зимни корҳои бостоншиносӣ дар чанд минтақаи ноҳияи Фархор бостоншиносон нигораҳоеро дарёфт намуданд, ки ба охири асри 3 ва аввали асри 2-и пеш аз мелод тааллуқ доштаанд. Ба  қавли Наталия Виноградова, бостоншинос аз Санкт-Петербург ҳоло  дар ноҳияи Фархор як гурӯҳ бостоншиносон нигораҳоеро дарёфт намудаанд, ки таърихи беш аз панҷҳазорсола доранд ва ин бозёфтҳо пурарзиш буда, аз маданияту фарҳанг ва ҳунармандии халқи тоҷик дар он асрҳо гувоҳӣ медиҳад.  Ҳоло олимон ин бозёфтҳоро мавриди таҳқиқ қарор додаанд ва баъди таҳлили пурра хулосаи хешро хоҳанд гуфт. Ба гуфти бостоншиносон аксари бозёфтҳо ба нигораҳои аз  Саразм дарёфтгардида шабоҳат доранд. Зарфҳои кулолӣ ва ороишоти занона пайвастагии маданияти Саразму Фархорро исбот мекунанд ва тахмин меравад, ки мардуми ин ду сарзамин бо ҳам робита доштаанд.  Ба гуфти мутахассисон соли оянда ковишҳо идома хоҳанд ёфт ва саҳифаҳои нави таърихи миллати тоҷикро боз хоҳанд кард.