Дар Душанбе ҷаласаи Комиссияи ҳамкории ММ бо ШФ доир гардид

Душанбе,13.11.2015. (АМИТ «Ховар»).-Тавсеаи равобити байнипарлумонии Тоҷикистону Русия зимни ҷаласаи панҷуми Комиссияи ҳамкории Маҷлиси миллии Маҷлиси Олии Ҷумҳурии Тоҷикистон ва Шӯрои Федератсияи Маҷлиси Федералии Федератсияи Русия дар Душанбе матраҳ гардид. Ҷаласа таҳти раёсати Абдураҳмон Қодирӣ- муовини аввали раиси Маҷлиси миллӣ ва Евгений Бушмин -муовини раиси  Шӯрои Федератсияи Русия, ки ҳамраисони комиссияи мазкуранд, доир гардид.
Иштирокдорони ҷаласа масоили марбут ба татбиқи амалии вазифаҳоеро, ки аз ҳуҷҷати хотимавии Форуми байнипарлумонии  «Русия — Тоҷикистон: неруи ҳамкории байниминтақавӣ» бармеоянд, инчунин дурнамои ҳамкории судманди Маҷлиси миллӣ ва Шӯрои Федератсия оид ба рушди ҳамкорӣ, таъмини ҳуқуқӣ дар соҳаҳои иқтисоду савдо, фарҳанг ва гуманитарӣ, нақшаи кории Комиссия барои соли 2016-ро баррасӣ намуданд. Ҳамзамон зарурати ҳамкории ҷадид дар бахши ҳимояи ҳуқуқ ва фароҳам овардани шароити мусоид барои муҳоҷирони меҳнатӣ, ташкили марказҳои муосири логистикӣ ва ҷойҳои нави корӣ, густариши робитаҳои тиҷоративу иқтисодӣ, фарҳангӣ ва гуманитарии байниминтақавӣ матраҳ  гардиданд.
Ҷонибҳо ҳамзамон омодагии худро роҷеъ ба доир намудани  Форуми навбатии байнипарлумонии «Тоҷикистону Русия: неруи ҳамкории байниминтақавӣ» дар соли 2016 дар Душанбе  изҳор доштанд.