Э. Раҳмон: «Парчами мо-таҷассумгари асосҳои таърихиву мероси арзишманди миллист»

Душанбе, 23.11.2015. (АМИТ «Ховар»). – Парчами мо ба сифати яке аз рамзҳои асосии давлатдорӣ таҷассумгари асосҳои таърихиву мероси арзишманди миллӣ, ифодакунандаи мақсаду маром ва орзуву ормони халқи куҳанбунёдамон ба ҳисоб меравад. Ин нуктаро Президенти кишвар Эмомалӣ Раҳмон дар Паёми телевизионии худ ба муносибати Рӯзи Парчами давлатӣ изҳор дошт.
Ба таъкиди Сарвари давлат, «ин суннати аҷдодӣ дар таърихи давлатдории тоҷикон собиқаи дерина дорад».  
«Тибқи сарчашмаҳои таърихӣ дар аввалин давлатҳои таъсисдодаи гузаштагони мо парчамдорӣ асоси ҳастӣ ва пешбурди корҳои давлат ба ҳисоб рафта, ин суннат дар давраҳои минбаъда низ бо риояи расму таомули хосаи миллӣ идома пайдо кардааст», — иброз намуд Эмомалӣ Раҳмон.