Форуми 5-уми байналмилалии БРО дар Филиппин

Душанбе, 30.11.2015. (АМИТ «Ховар»).-Форуми 5-уми байналмилалии Бонки Рушди Осиё (БРО) дар мавзўи «Маҳорату малака: афзалиятҳои ҷорӣ дар самти таҳсилоти касбию техникӣ ва тайёрии кадрҳо» дар шаҳри Манилаи Филиппин 1 ва 2 декабри соли 2015 баргузор хоҳад шуд. 
Дар кори форуми мазкур аз ҷониби Тоҷикистон сардори Раёсати муносибатҳои байналмилалӣ ва робита бо ҷомеаи Вазорати меҳнат, муҳоҷират ва шуғли аҳолии Ҷумҳурии Тоҷикистон Латифӣ Усмоналӣ Ноибпур иштирок мекунад.
Бояд зикр кард, ки дар низоми вазорат 63 литсейи касбию техникӣ фаъолият менамояд, ки дар онҳо зиёда аз 21 ҳазор касбомўз аз рўи 90 ихтисос ба таҳсил фаро гирифта шудаанд.
Дар назар аст, ки Латифӣ Усмоналӣ дар кори форум вобаста ба  ҳамкорӣ бо Бонки Рушди Осиё оид ба масъалаҳои ислоҳоти соҳаи таҳсилоти ибтидоии касбӣ, мустаҳкам кардани заминаҳои моддию техникӣ, таъмин кардани раванди таълим бо таҷҳизоту техникаи замонавии таълимӣ, аёнияту китобҳои дарсӣ сухан гӯяд. Дар форум инчунин масъалаҳои такмили ихтисоси кормандони роҳбарикунанда ва муҳандисию омўзгории муассисаҳои таҳсилоти ибтидоии касбӣ ва ҷорӣ намудани усулҳои нави меъёрҳои салоҳиятноки таълим мавриди баррасӣ қарор дода мешаванд.