Х.Холиқназар: Назару диди коршиносони ватаниву хориҷӣ барои мо хеле муҳим аст

Душанбе, 12.11.2015. (АМИТ «Ховар»).-«Назару диди коршиносони ватаниву хориҷӣ барои мо хеле муҳим аст. Имрӯз  дар ҷомеаи ҷаҳонӣ  баҳсҳо дар мавриди рушди Тоҷикистон бисёр ба миён омада истодаанд ва барои мо махсусан мулоҳизаҳои мутахассисоне, ки дар соҳаи мақроиқтисодӣ кор мебаранд,  муҳиманд», — гуфт директори Маркази тадқиқоти стратегии  назди Президенти ҶТ Худобердӣ Холиқназар дар ифтитоҳи  Симпозиуми байналмилалии илмию экпертӣ дар мавзӯи «Тоҷикистон-2030: дар самти рушди устувори инсонӣ», ки имрӯз, 12 ноябр дар Душанбе ба кори худ оғоз кард. 
 Ҳадафҳои симпозиум аз  баррасии рушди ояндаи дарозмуддати ҶТ, мубоҳисаҳои коршиносона оид ба самтҳои калидии рушд, пешниҳоди шароити муфид барои мубоҳисаи асоснок ва мубодилаи афкор оид ба ҷанбаҳои калидии рушди сармояи инсонӣ, дастгирӣ ва пешбурди ташаббусҳое, ки ба таъмини самаранокии дигаргуниҳои иқтисодӣ дар доираи сармояи инсонӣ равона шудаанд, мусоидат ба рушди механизмҳои ҳамкории мақомоти идоракунандаи давлатӣ, соҳибкорӣ ва ҷомеаи шаҳрвандӣ дар таъмини рушди устувори инсонӣ иборат мебошанд. Дар кори Симпозиум коршиносони соҳаи иқтисодии ватанию хориҷӣ,  намояндагони Вазорати маориф ва илми кишвар, мутахассисони Барномаи рушди СММ ва донишҷӯёни бахши иқтисодии донишгоҳҳои пойтахт иштирок доранд. 
«Дар  симпозиуми имрӯза масоили мухталифи бахши иқтисодӣ, асосан вобаста ба рушди устувори Тоҷикистон барои то соли 2030 баҳсу мунозира хоҳанд шуд. Дар  ҷараёни симпозиуми имрӯза мо ба таври возеҳ масъалаҳои иқтисодиро баҳс хоҳем кард»,-  илова намуд Худобердӣ Холиқназар. 
Симпозиум шомили ҷаласаҳои пленарӣ ва нишастҳо дар чор бахш буда, дар онҳо коршиносон, намояндагони вазоратҳои соҳавӣ ва ҷомеаи шаҳрвандӣ оид ба ҷанбаҳои калидии рушди устувори инсонӣ  андешаронӣ хоҳанд кард. Дар ҷаласаҳои симпозиум масъалаҳои сиёсати ҷавонон, нобаробарии иқтисодӣ ва рушди инсонӣ, амнияти инсонӣ, камбизоатӣ ва сиёсати давлатии мубориза бо камбизоатӣ  масъалагузорӣ ва  баррасӣ мешаванд.