Хуҷанд: 17 корманди милитсия бо ифтихорнома сарфароз гардиданд

Душанбе, 10.11.2015. (АМИТ «Ховар).- Кормандони шуъбаи Вазорати корҳои дохилии Ҷумҳурии Тоҷикистон дар шаҳри Хуҷанд иди касбии худ- Рӯзи милитсияи тоҷикро бо танатана ҷашн гирифтанд. 
Дар ҷамъомади идона раиси шаҳри Хуҷанд Раҷаббой Аҳмадзода зимни табрики кормандони милитсия аз садоқату вафодории касбии ҳомиёни ватан сухан карда, гуфт: «Дар шаҳри Хуҷанд барои ҳифзи мардум аз ҷинояткорону вайронкунандагони қонун фаъолияти пурсамари мақомоти корҳои дохилаи шаҳр аз он дарак медиҳад, ки заминаҳои аввалини моддӣ барои ҳифзи зиндагии осоиштаи мардум фароҳам оварда шудаанд. Барои пойдории Тоҷикистони азизамон, аз ҷумла беҳтарин кормандони шуъбаи корҳои дохилии шаҳри Хуҷанд низ ҷони худро қурбон намуданд, ки хотираи онҳо дар дилҳои мо абадӣ боқӣ мемонад.
Дар назди милитсия вазифаҳои муҳиму масъулиятноки тақвияти низоми ҳуқуқӣ, баланд бардоштани сатҳи маърифати ҳуқуқии шаҳрвандон, таъмини осоишу амнияти онҳо, ҳифзи ҳуқуқу озодиҳои инсон ва дар ин раванд вусъати беш аз пеши мубориза бар зидди  ҷинояткорӣ, аз ҷумла зуҳуроти барои ҳаёти ҷомеа таҳдидовар ва хатарнок, ба мисли нашъамандӣ, пешгирии фаъолияти ташкилоти экстремистии динӣ меистанд. Ин нуктаҳо дар суханрониҳои Сарвари давлат Эмомалӣ Раҳмон ва нишондодҳои алоҳида таъкиди худро ёфтаанд.
Соли равон кормандони мақомоти корҳои дохилии Ҷумҳурии Тоҷикистон дар амалиёти махсус оид ба дастгирнамоии ҷинояткорон-оилаи Раҳматовҳо дар шаҳри Хуҷанд фаъолона иштирок карда, ҷинояти чандинсолаи вазнинро ошкор ва барои ҷазои сазовор гирифтани ҷинояткорон мусоидат намуданд».
Раиси шаҳри Хуҷанд  17 корманди милитсияро, ки барои ҳимояи ҳуқуқу манфиатҳои мардум хизмати шоиста намудаанд, бо ифтихорномаи Мақомоти иҷроияи ҳокимияти давлатии шаҳри Хуҷанд сарфароз гардонид.
Ҳамчунин барои аз дарёи Сир наҷот додани шаҳрванде, ки қасди худкушӣ дошт,  раиси шаҳри Хуҷанд Раҷаббой Аҳмадзода ба корманди милитсия Фирӯз Раҳматов туҳфаи хотиравӣ тақдим намуд.