Иштироки Сафири Тоҷикистон дар ҳамоиши байналмилалӣ ба муносибати бузургдошти Мирсаид Алии Ҳамадонӣ

Душанбе, 12.11.2015 (АМИТ «Ховар»).- 11 ноябри соли 2015 дар устони Ҳамадони Ҷумҳурии Исломии Эрон ба муносибати бузургдошти донишманд ва мутафаккири Шарқ  Мирсаид Алии Ҳамадонӣ  бо иштироки донишмандону муҳаққиқон ва ҳамадоншиносони маъруф аз Тоҷикистон, Покистон, Афғонистон ва Эрон ҳамоиши байналмилалӣ баргузор гардид.
 Сафири  Тоҷикистон Неъматулло Эмомзода занги Мирсаид Алии Ҳамадониро дар Ҳунаристони «Таҳзиб»-и Ҳамадон ба садо даровард ва ҳамоиши байналмилалӣ ифтитоҳ ёфт.
 Н. Эмомзода зимни ҳамоиш роҷеъ ба мероси пурғановати Мир Сайид Алии Ҳамадонӣ, таҳқиқи замони шоир, нақши ин мутафаккир дар рушди тамаддуни Осиёи Марказӣ маъруза намуд.
 Бо назардошти сатҳи хуби ҳамкорӣ Сафири Тоҷикистон бо устондори Ҳамадон Муҳаммадносири Некбахт дар робита ба баррасии масъалаҳои иқтисодӣ, тиҷоратӣ ва ҳамкорӣ байни бародаршаҳрҳои Кӯлоб ва Ҳамадон мулоқот доир намуд.