Изҳори миннатдории Аҳтам Абдуллозода ба иштирокдорони роҳпаймоии ҷавонон

Душанбе, 25.11.2015. (АМИТ «Ховар»). — «Иттифоқи ҷавонони Тоҷикистон ба ҳамаи шумо, ҷавонони саодатманди диёр, барои иштироки фаъолона дар роҳпаймоии осоишта, ки бахшида ба Рӯзи Парчами давлатӣ дар саросари ҷумҳурӣ  бо шукӯҳу шаҳомати хосса баргузор гардид, изҳори сипос менамояд»,-омадааст дар муроҷиатномаи Аҳтам Абдуллозода, раиси Кумитаи ҷавонон, варзиш ва сайёҳӣ барои иштироки ҷавонон дар роҳпаймоӣ бахшида ба Рӯзи Парчами миллӣ.
-Ҷоизи ёдоварист, ки сулҳу субот ва фазои орому осудаи мамлакат маҳз бо заҳмату талошҳои Пешвои миллат- Эмомалӣ Раҳмон ва сиёсати хирадмандонаву созандаи Роҳбари давлатро дастгирӣ намудани тамоми халқи Тоҷикистон ба даст омадааст.  
Дар ин асно, имрӯз ба ҳар як сокини ҷумҳурӣ шароити зиндагии арзандаи иҷтимоӣ, фазои ором ва тинҷиву осоиштагӣ  кафолат дода шудааст.
Таҷлили ботантанаи Рӯзи Парчами давлатӣ, баргузории роҳпаймоии осоишта бо иштироки зиёда аз 40 ҳазор нафар ҷавонон-ин нишонаи Сулҳ, Ваҳдат, Истиқлолият ва муҳаббату садоқат ба ин миллату Ватан аст.
Парчам рамзи ҳаёти осоишта, бахту иқболи сафед, умед ба фардои дурахшон ва арзи эҳтироми ҳар шаҳрванди худогоҳу худшинос буда,  арҷ гузоштан ба он вазифаи инсонӣ ва қарзи шаҳрвандии  ҳар яки мову шумост. 
Иштироки фаъоли ҷавонон дар раҳпаймоӣ- ин нишони ифтихори ватандорӣ ва эҳсоси масъулият дар назди Ватан аст.
    Барои муносибати самимонаатон ба арзишҳои миллӣ ва дӯст доштани муқаддасоти давлатӣ, иштироки фаъолона дар роҳпаймоӣ ба вазорату идораҳои дахлдор, муассисаҳои таҳсилоти олии касбии мамлакат ва донишҷӯёни тоҷике, ки дар дохил ва хориҷи кишвар таҳсил менамоянд,  миннатдорӣ баён менамоем.
Таҷлили ботантанаи  Рӯзи Парчами давлатии Ҷумҳурии Тоҷикистон нишони эҳтироми хосса ба анъанаҳои неки аҷдодони сарбаландамон ва таҷассумгари мақсаду мароми мо дар роҳи эъмори давлати демократии ҳуқуқбунёди дунявист.
Умедворем, ки мо ҷавонон дар асоси сарҷамъиву муттаҳидӣ, эҳтиром ба муқаддасоти миллӣ ва бо истифода  аз шароити фароҳамовардашуда илму касб меомӯзем ва Ватани маҳбуби худро минбаъд низ ободу зебо мегардонем,-изҳори умед намудааст раиси Иттифоқи ҷавонони Тоҷикистон                         Аҳтам Абдуллозода.