Изҳороти Вазорати корҳои хориҷии Тоҷикистон

Душанбе, 27.11.2015. (АМИТ «Ховар»). -Ҷониби Тоҷикистон ҳодисаи ногувори марбут ба сарозер кардани ҳавопаймои ҳарбии Русияро дар санаи 24 ноябри соли 2015, ки дар амалиёти зиддитеррористӣ иштирок мекард, бо андӯҳ қабул намуда, ба хешовандону наздикони хизматчиёни ҳарбии ҳалокшуда изҳори тасаллият менамояд.
Мо дар шароити муосир мавҷудияти ҳамраъйӣ, ваҳдат ва дастгирии мутақобиларо дар мубориза бо терроризм дар сатҳи байналмилалӣ ва ҷавоби маҷмӯӣ ба душмани муштараки мо-терроризми ҷаҳониро муҳим мешуморем. 
Дар ин росто, маъракаи зидитеррористии гузаронидаи Русия ҷойгоҳи муҳимро касб мекунад. 
Ҳамчун ҷонибдори муътақид ба амалиёти якҷояи ҷомеаи байналмилалӣ дар мубориза бар зидди терроризм, Тоҷикистон умедвор аст, ки ҳодисаи рухдодаи сарозер шудани ҳавопаймои Федератсияи Русия холисона арзёбӣ шуда, ба муташанниҷ нашудани вазъ ва ба эътидол омадани муносибати тезутундшудаи Русия ва Туркия мусоидат мекунад.