Конфронси илмӣ-амалии «Дин ва миллат: низоъҳои идеологӣ ва сиёсӣ дар ҷаҳони ислом» дар Душанбе оғоз шуд

Душанбе, 19.11.2015. (АМИТ «Ховар»).-Имрӯз конфронси ҷумҳуриявии илмӣ-амалӣ  дар мавзӯи «Дин ва миллат: низоъҳои идеологӣ ва сиёсӣ дар ҷаҳони ислом»  дар  маҷлисгоҳи Маркази тадқиқоти стратегии назди Президенти Ҷумҳурии Тоҷикистон ба кори худ оғоз намуд ва ин лаҳзаҳо идома дорад. 
Ёрдамчии Президенти Ҷумҳурии Тоҷикистон оид ба рушди иҷтимоӣ ва робита бо ҷомеа Абдуҷаббор Раҳмонзода зимни сухани ифтитоҳӣ гуфт: «Яке аз зуҳуроти нангину хатарноки ҷаҳони имрӯза гаравиши ҷавонон ба ҳаракату равияҳои бегонаву хатарнок, шомил шудан ба гурӯҳҳои муташаккили ҷиноӣ ва тақлид ба расму ойин ва тарзи либоспӯшии бегона мебошад, ки наврасону ҷавононро аз асолати миллӣ дур месозанд. Ҷавонони мо  бо он ғурур ва эҳтироми бузурге, ки ба арзишҳои миллӣ доранд, бояд  намуна бошанд ва бар зидди таъсири манфии падидаҳои бегона ва умуман бегонапарастиву тақлидкорӣ мубориза баранд».
Ҳамоишро Маркази исломшиносӣ дар назди Президенти ҶТ  ташкил намудааст.   Дар конфронс маърӯзаҳо дар мавзуъҳои «Ҷойгоҳи дин дар давлати дунявӣ», «Хатари ба ном «Давлати исломӣ» барои идеологияи миллӣ», «Ҷанбаҳои таърихии илоҳиёти сиёсии салафият ва мушкилоти идеологии равандҳои миллатсозӣ дар олами муосири ислом», «Низоъҳои динию мазҳабӣ: сабаб, вазъ ва роҳҳои ҳалли он», «Арзишҳои миллӣ ва динӣ дар адабиёт» аз ҷониби олимону сиёсатшиносон шунида хоҳанд шуд. 
Баъди нисфирӯзӣ кори конфронси илмӣ дар ду бахш- бахши   якум «Ҷанбаҳои назариявӣ ва ҳуқуқӣ-сиёсии муносибати миллат ва дин» ва бахши дуюм, ки «Таносуби унсурҳои миллӣ ва динӣ дар ҳаёти ҷомеа» номгузорӣ шудааст, идома меёбад.