Коршиноси USAID бо вазъу дурнамои рушди бахши кишоварзию саноат шинос шуд

Душанбе, 11.11.15. (АМИТ «Ховар»). — Муовини раиси  Палатаи  савдо  ва  саноати  Тоҷикистон Асомиддин  Ризоев  бо коршиноси  USAID оид ба  масоили  иқтисодиёт  Денис Ҳол мулоқот  анҷом  дод. 
Тавре  ки  ПСС ҶТ хабар  медиҳад, мақсад  аз  ташрифи  Денис  Ҳол иборат  аз  муҳокимаи  масъалаҳои  рушди  бахши  кишоварзию   саноати  Тоҷикистон, аз ҷумла фаъолияти   соҳибкории   хурду  миёна  дар   соҳаи  мазкур,  ҳамчунин  масоили  тиҷорат,  интиқоли  амвол  ва  ғайра   мебошад. 
Асомиддин  Ризоев   ба  меҳмон  аз мақсадҳои сиёсати   бахши  кишоварзӣ, ки  иборат  аз  таъмини  рушди   ҳамаи  бахшҳои   кишоварзию  саноат,  афзун  намудани  самараи  он,  густариши  рақобатпазирӣ  ва  таъмини  бехатарии  маводи  ғизоӣ  дар  заминаи он  мебошад,  нақл  кард.
Мавсуф  ҳамчунин   коршиносро бо  барномаи  давлатии  рушди  картошкапарварӣ  дар  кишвар  барои   солҳои  2012 — 2016,  ки дар  он  ба  афзун  намудани  ҳосилнокӣ, парвариши картошкаю  сабзавоти пешпазак,  зиёд  намудани  хели онҳо бо  усули аз  кишварҳои  дигар  ворид  намудани  тухмии  серҳосил  таваҷҷуҳи  хосса зоҳир  карда мешавад, шинос  намуд. 
«Қонуни  ҶТ «Дар  бораи  занбӯриасалпарварӣ» бояд  маҳсули  соҳаи  мазкур  ва растанипарвариро афзун  намояд. Барномаи  рушди соҳаи моҳипарварӣ  дар  ҶТ  чун  яке  аз  соҳаҳои  ояндадор  қабул  шудааст. Корхонаҳои  паррандапарварӣ  аҳолии  маҳаллиро  бо  маҳсулоти  худ қариб  пурра таъмин  менамоянд», —  гуфт  муовини раиси Палатаи  савдо  ва  саноат.
Қобили  зикр  аст, ки  алҳол  дар  бахши  кишоварзию  саноат  6 лоиҳаи  сармоягузорӣ иборат  аз  100 миллион  доллари  ИМА  дар  амал  татбиқ  карда  мешавад, ки  он бояд  рушди  бахши  кишоварзию  саноат, таҷдиди   корхонаҳои  мавҷуда,  бунёди  корхонаҳои  нави  коркарди  маҳсулот, ҳалли  вазифаҳои  фурӯшу  судури  маҳсулоти   кишоварзӣ,  хариди  мошинҳои соҳаи  кишоварзӣ  ва  таҷҳизоти технологиро  таъмин  намояд.