Мубориза бар зидди маводи нашъаовар

Душанбе, 25.11.2015. (АМИТ «Ховар»).- 24 ноябри соли равон, ҳангоми гузаронидани чорабиниҳои фаврӣ-ҷустуҷӯӣ аз ҷониби кормандони милитсия дар шаҳри Норак ду сокини 24-солаи ноҳияи Ҳамадонӣ ҳамчун гумонбар дар ғайриқонунӣ нигоҳ доштани маводи нашъаовар дастгир шуданд. Дар вақти кофтукови мошини  тамғаи “КИА Оптима”, ки ба яке аз онҳо тааллуқ дошт, 1 килограмму 460 грамм  маводи нашъадори “героин” дарёфт ва мусодира шуд.
Ҳамчунин аз ҷониби кормандони милитсия дар шаҳри Чкалов сокини 42-солаи ҳамин шаҳр, ки пеш бо моддаи 200 қисми 4 Кодекси ҷиноятии Ҷумҳурии Тоҷикистон суд шудааст, бо гумони муомилоти  ғайриқонунии маводи мухаддир дастгир шуд. Дар вақти кофтукови шахсӣ аз ӯ  170 грамм маводи нашъадори героин ва 1 килограмму 935 грамм маводи нашъаовари ҳашиш дарёфт ва мусодира гардид.
Дар маҷмӯъ, тайи шабонарӯзи гузашта кормандони милитсия зимни бурдани чорабиниҳои фаврӣ-ҷустуҷӯӣ аз гардиши ғайриқонунии маводи мухаддир 3 килою 565 грамм маводи нашъаоварро дарёфт ва мусодира намуданд.