«Нашъамандӣ вабои имрӯзу фардои ҷомеа»-семинар

Темурмалик, 12.11.2015. (АМИТ «Ховар).-Бо ибтикори Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, бахши ҷавонон, варзиш ва сайёҳии ноҳияи Темурмалик дар ҳамкорӣ бо ҳокимияти маҳаллӣ ва дигар ташкилот дар маркази ноҳия дар мавзӯи «Нашъамандӣ вабои имрӯзу фардои ҷомеа» семинари ноҳиявӣ доир намуданд.
Тавре  ки Аслиддини Айниддин, мудири бахши варзиш ва сайёҳии ноҳияи Темурмалик  иттилоъ  дод, дар семинар зикр гардид, ки то ҳанӯз на ҳама ҷавонон зарари маводи мухаддирро дарк намудаанд ва аз ин рӯ шумораи истифодабарандагони маводи мухаддир дар ҳоли афзоиш аст. Пешгирии ин амали номатлуб ба дӯши аҳли ҷомеа мебошад ва бояд ҳар як фард муборизаро бар зидди маводи нашъадор ва истифодаи он пурзӯр намояд. 
Дар ҳамоиш инчунин маърӯзаҳо оид ба мавзӯъҳои фаъолияти бахши чавонон, варзиш ва сайёҳии ноҳия дар самти пешгирии бемории нашъамандӣ, таҳлили вазъ ва гирифторони бемории нашъамандӣ дар маҳал, фаъолияти Шӯрои ҳамоҳангсозии пешгирии бемории нашъамандӣ дар ноҳия ва боз чанде дигар шунида шуданд. 
Суханронии мутахассисони соҳа дар бораи тарзу усулҳои мубталогардӣ ба бемории нашъамандӣ  барои ҷавонон таъсирбахш буд. Дар қисмати дуюми чорабинӣ дар хонаи кинои ноҳия чорабинии фарҳангӣ- маърифатӣ доир гардид, ки дар он ҷавонон саҳнаҳои гуногунро дар бораи бемории нашъамандӣ ва оқибати он намоиш доданд.