Нуриддин Саид: баҳо бо дониши хонандагон мувофиқат надорад

Душанбе, 11.11.2015. (АМИТ «Ховар). — Дар муассисаи таълимии №1-и ноҳияи Восеъ вохӯрии вазири маориф ва илми ҷумҳурӣ Нуриддин Саид бо масъулини соҳаи маорифи  ноҳияҳои  минтақа  баргузор гардид. Дар вохӯрӣ масъалаҳои омодагӣ ба олимпиадаҳои хонандагон, имтиҳонҳои мутамарказонидашудаи дохилшавӣ, тайёрӣ ба зимистонгузаронӣ ва  тартиби иҷораи китобҳои дарсӣ мавриди баррасӣ қарор гирифтанд. 
Вазири маориф ва илми ҷумҳурӣ Нуриддин Саид  баъд аз шунидани ҳисоботи масъулин дар масъалаҳои мазкур аз номувофиқатии баҳо бо дониши хонандагон интиқод карда, аз ҷумла гуфт: «Низоми имтиҳонҳои мутамарказонидашудаи дохилшавӣ бори дигар номувофиқатии баҳо бо дониши хонандагонро собит  сохт. Мо бояд ҳар чӣ бештар роҳҳои ислоҳи нуқсонҳои мавҷуда ва пешрафти корро муайян намоем. Дар ин самт ташкил намудани мактабҳои такягоҳӣ ва баланд бардоштани такмили ихтисоси омӯзгорон, ки имрӯз ба талабот ҷавобгӯ нест, аз омилҳои  асосӣ ба шумор  меравад». 
Вазир ба директорони муассисаҳои таълимӣ  ва мудирони шуъбаҳои маориф баҳри ислоҳи камбудиву норасоиҳо ва пешрафти соҳа ҷалби раисони ноҳияҳо ва соҳибкорони ватаниро тавсия дода, дастур дод, ки корҳои фаҳмондадиҳиро дар ин самт  баланд бардоранд.
Дар ин бора аз Вазорати маориф ва илми Ҷумҳурии Тоҷикистон иттилоъ доданд.