Оила чун рукни ибтидоии ҷомеа бояд зимни интихоби бошуурона ташкил ёбад

Душанбе, 20.11.2015. (АМИТ Ховар). — «Дар даврони соҳибистиқлолӣ оилаи тоҷик сол ба сол ташаккул ёфта истодааст, зеро Ҳукумати Ҷумҳурии Тоҷикистон ва хосатан Сарвари давлат барои солимгардонии оилаи имрӯзаи тоҷик қонун, санад ва қарорҳои махсуси зиёдеро ба имзо расонидаанд, ки бо шарофати онҳо сатҳи устувории оилаҳо баланд шуда истодааст»,- иброз намуд муовини раиси Кумитаи ҷавонон, варзиш ва сайёҳӣ Амирбекзода Ҳабибулло дар машварати омӯзишӣ, ки бо ҷалби мутахассисон ва   ҷавонони фаъол бо мақсади такмили малакаи ҷавонон дар самти бунёди оилаи солим дар Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд ҷараён дорад.
Амирбекзода Ҳабибулло афзуд, ки яке аз масъалаҳои мубрами ҳаёти имрӯзаи ҷомеа бунёди оилаи нав ба шумор меравад, ки ҳалли дурусти он ба тарзи ҳаёт ва ҷараёни инкишофу малакаи худи инсон низ вобаста аст. Оила ҳамчун рукни ибтидоии ҷомеа бояд зимни интихоби мақсаднок ва бошуурона ташкил ёбад. 
Гарчанде ҷавонон дар ташкили оилаи худ мустақиланд, аммо ҷомеа ва давлат ҳеҷ гоҳ нисбат ба ин масъала бетарафу бетафовут набуда, балки дар хушбахтиву пойдории он ҳамеша манфиатдор мебошад. 
Дар машварат дар мавриди вайроншавиҳои оилаҳои ҷавон иброз доштанд, ки омӯзиши вайроншавии оилаҳо ба он далолат мекунад, ки бештари оилаҳо бо сабаби ҳамаҷониба омода набудани ҷавонон ба ҳаёти оилавӣ ба вуҷуд меоянд. Мутаассифона, дар ин ҷабҳа на оила ва на мактаб саҳми зарурӣ нагузошта истодаанд. Аз ин рӯ татбиқ намудани чорабиниҳои муайян, аз ҷумла машваратҳои омӯзишӣ дар ин самт бартарият пайдо мекунанд. 
Машварат бо ташаббуси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ташкил гардид.