Ғолибияти варзишгари «Динамо» дар мусобиқаи байналмилалӣ

Душанбе, 19.11.2015. (АМИТ «Ховар»). -13-15-уми ноябри соли ҷорӣ дар Маҷмааи варзишии Кумитаи андози назди Ҳукумати Ҷумҳурии Тоҷикистон мусобиқаи байналмилалӣ аз намуди таэквандо — ВТФ баргузор гардид, ки дар он варзишгарон аз Ҷумҳуриҳои Қазоқистон, Тоҷикистон ва Ҷумҳуриҳои Исломии Афғонистону Эрон ширкат карданд.
Дар мусобиқаи сатҳи байналмилалӣ намояндагони Шӯрои ҷумҳуриявии «Динамо»-и Вазорати корҳои дохилӣ низ обрӯю нуфуз ва шарафи Ҷумҳурии Тоҷикистонро ҳифз намуданд.
Мураббии калони варзиши қисми низомии 5453-и Раёсати қӯшунҳои дохилии ВКД майори хизмати дохилӣ Сайдуллоев Умед Ҳикматуллоевич бо кӯшишу ғайрати худ ба финал баромада, ба рақиби худ аз Ҷумҳурии Исломии Афғонистон дастболо гардид. Дар натиҷа Умед Сайдуллоев ба гирифтани ҷойи аввал ва медали тилло мушарраф шуд.
Ҳамчунин муаллими варзиши қисми низомии 5453-и Раёсати қӯшунҳои дохилӣ капитани хизмати дохилӣ Ғиёсов Хусрав Ҳаитбекович дар ин мусобиқаи байналмилалӣ довариро ба уҳда дошта, бо маҳорату малакаи касбӣ ба гирифтани унвони «Беҳтарин довари мусобиқа» сарфароз гардид.