Омӯзгорони Академияи ВКД бо рутбаҳои навбатӣ сарфароз гардиданд

Душанбе, 10.11.2015. (АМИТ «Ховар).-Дирӯз, 9-уми ноябр дар Академияи ВКД Ҷумҳурии Тоҷикистон бахшида ба солгарди таҷлили Рӯзи милитсия маросими тантанавӣ баргузор гардид, ки дар он роҳбарият ва ҳайати омӯзгорону донишҷӯёни  Академия иштирок доштанд. 
Дар чорабинӣ дақиқаи хомӯшӣ барои поси хотираи кормандоне, ки зимни адои хизмат ҳалок гардидаанд, эълон гардид. Сипас, парчами Академияи ВКД ба майдон ворид карда шуда, Суруди миллӣ садо дод. 
Сардори Академияи ВКД Файзалӣ Шарифзода ҳайати шахсиро бо ҷашни касбии кормандони милитсия табрик карда, дар фаъолияти  пуршарафашон бурдборӣ таманно намуд. 
Зикр гардид, ки донишҷӯёни Академия танҳо бо таҳсили хуб ва интизоми намунавӣ номбардорони падарон, такягоҳи давлату ҷомеа дар самти ҳифзи тартиботи ҷамъиятӣ ва ҳуқуқи шаҳрвандон мегарданд. Дар идомаи чорабинии идона ҳайати омӯзгорону донишҷӯён низ  суханони табрикӣ гуфтанд. 
Ҳамчунин бо фармонҳои вазири корҳои дохилӣ ва сардори Академияи ВКД ба як гурӯҳ омӯзгорон ва донишҷӯёне, ки нисбат ба кору таҳсил муносибати софдилонаю  рафтори намунавӣ доштанд, рутбаҳои навбатӣ ва мукофотҳо тақдим гардиданд.