Пан Ги Мун ба муваффақияти конфронси СММ оид ба иқлим бовар дорад

Душанбе, 30.11.15. (АМИТ «Ховар»). — Дабири  кулли  СММ Пан Ги  Мун бовар  дорад, ки  сарварони   кишварҳои  ҷаҳон  дар  ҷараёни Ҳамоиши  СММ, ки  имрӯз, 30  ноябр,  дар  шаҳри  Париж оғоз  ёфт, созишномаи  муҳим дар  мавриди  иқлимро  тарҳрезӣ менамоянд.  Дар  назар  аст, ки  дар   кори  ҳамоиш  тақрибан 150  нафар  сарварони  давлату  ҳукуматҳо  иштирок намоянд. 
Имрӯз вазифаи  ҷомеаи  ҷаҳон   роҳ  надодан  ба  то  охири аср   на  бештар  аз 2°С  баландшавии ҳарорати  ҳаво  аст. Аз ин  сатҳ  гузаштани  баландшавии  ҳарорати  ҳаво  метавонад  оқибатҳои   басо  ҷиддие  барои  сайёра дошта  бошад.
Пан  Ги  Мун  зимни мусоҳибаи  хоссаи радиои СММ  изҳор  дошт, ки  ба ҳамоиши  Париж аз рӯи  масъалаи   иқлим назари нек  дорад,  зеро ҷиҳатҳои  мусбати  сиёсӣ ба  назар  мерасанд. Ба  гуфтаи  Дабири  кулли  СММ,  имрӯз ба   зарурати   дидани  чораҳои  таъҷилӣ   дар  бахши  иқлим  касе  шубҳа  надорад. Теъдоди  сарварони  ҷаҳон, ки ба  ҳамоиши   Париж  меоянд,  ҳамчунин  нақшаҳои  фаъолиятро  дар  бахши  иқлим  пешниҳод  намудани беш  аз  180  кишвар аз ин  далолат  мекунад. Дар  ин  нақшаҳо  тадбирҳои  коҳиш  додани ифлосшавии  ҳаво ва  афзун  намудани   нерӯи  муқовимат  ба  тағйирёбии  иқлим  муайян  шудаанд. 
Пан  Ги  Мун  ёдовар  шуд, ки Гурӯҳи  байнипарлумонии  коршиносон  оид ба  тағйири  иқлим  нақшаҳои  мухталифро  пешниҳод  намуд, ки  ҳаҷми  гуногуни  фаъолиятро  дар  назар  доранд. Агар чора  дида нашаваду ҷаҳон  дар  ҳамон  самти  ҳозира  пеш  равад,  то  охири  ҳамин  аср  баландшавии  ҷаҳонии  ҳарорати  миёнаи ҳаво  4°С — ро ташкил  медиҳад.
«Маълумоти  илмӣ  касеро ба  шубҳа  намеорад — сабаби тағйир  ёфтани  иқлим рафтори  инсон  аст, —  зикр  намуд  Пан Ги  Мун. — Биноан мо бояд  рафтору  тарзи  зиндагии  худро  тағйир  диҳем. Мо  вақти  зиёд  надорем,. Бинобар ин  ман   сарварони  кишварҳои  ҷаҳонро даъват  мекунам, ки  масъулияти  сиёсию  маънавӣ  барои   беҳбудии  башариятро  ба  дӯши  худ  гиранд». 
Худи  ҳоло бар  асари дар  ҳаво  паҳн  шудани  карбон ҳарорати  миёнаи  он  тақрибан  баробари 0,85 °С баланд  шудааст. Дар  натиҷаи  ин қариб  нисфи  қабати  доимии яхҳои Арктика  об  шуд, дар  Амрикои  ғарбӣ  аз  сирояти ҳашарот, ки  сабаби  он  гармшавии  ҳаво  аст, миллионҳо  акр бешазор хароб  гардид, баъзе яхпораҳои калонтарини  Антарктикаи ғарбӣ, ки  дар  онҳо  даҳҳо  ҳазор мили мукааб ях ҷойгир  аст, шурӯъ  ба  харобшавӣ  кардаанд. Ҳатто  агар  фардо  сатҳи баландшавии СО2 хотима  ёбад ҳам,  гармшавии  ҷаҳон  идома  ёфта, ҳарорат тақрибан  баробари  0,5 °С  баланд мешавад.
Дабири  кулли  СММ  сарони   давлату  ҳукуматҳоро  бори  дигар   даъват  намуд, ки пешсафии  маънавию сиёсиро  ба  манзури рушди  устувор  ва  шукуфоии  тамоми  башарият  намоиш  диҳанд. 
«Тағйири  иқлим  сарҳади  миллӣ  надорад,  —  гуфт роҳбари  СММ.  — Ин  ҳодисаи  ҷаҳонист ва сарварони  кишварҳои  ҷаҳон  мефаҳманд, ки сармоягузории  оқилона  дар  бахши  иқлим  ба рушди  иқтисодиёт   мусоидат  мекунад. Дар  бисёр  кишварҳо  аллакай  манбаъҳои бозтакрори энергия, аз ҷумла манбаъҳои энергияи  офтобӣ  истифода  мешаванд. Ин  бахш  босуръат  рушд  меёбад».
Пан  Ги  Мун  ҳамроҳи сокинони  Париж ва меҳмонони  он, ки  дар  роҳпаймоӣ  барои   дастгирии  ҳамоиш  иштирок карда натавонистанд, пойафзоли  худро  дар  майдони Ҷумҳурӣ  боқӣ  гузошт. Ин  майдон  бояд ҷойи  роҳандозии роҳпаймоӣ гардад, ки  ҳукуматдорон,  бинобар  хавфу  хатар  аз  амалиётҳои   нави террористӣ  онро  бекор  карда буданд. Ҳазорҳо  ҷуфт  пойафзоле, ки дар  ҷараёни  ин тадбир  дар  майдон   гузошта шудаанд, дар  байни  гурезаҳои  Сурия тақсим  карда  мешаванд.