Р. Раҳимзода: «Масъулияти кори милитсия муҳим, вале сангин аст»

Душанбе, 10.11.2015 (АМИТ «Ховар»).-Дар идомаи ҷаласаи тантанавӣ бахшида ба Иди касбии кормандони милитсия  имрӯз вазири корҳои дохилӣ Раҳимзода Рамазон Ҳамро зимни суханронӣ зикр кард, ки: «Милитсияи Тоҷикистон яке аз фаъолтарин сохтори қудратии давлат маҳсуб шуда, масъулиятеро бар дӯш дорад, ки басо ҳассос ва дар бисёр маврид сангин аст. Милитсия ҳамеша ҳимояи ҳуқуқу манфиатҳои мардум, ҳифзи молу мулк, таъмини тартиботи ҷамъиятӣ, волоияти қонун ва мубориза бо ҷинояткориро рисолати аслии худ шинохта, дар ин роҳи пуршараф корҳои зиёдеро анҷом додааст. Ин аст, ки ҷомеаи мо ба нақши милитсия дар таҳкиму пойдории сулҳу суботи кишвар ва ҳифзи тартиботи ҷамъиятӣ баҳои баланд дода, ба заҳмати кормандони Вазорати корҳои дохилӣ барои таъмини бехатарӣ ва оромии сокинон эҳтиром мегузорад».
Дар идомаи ҷаласаи тантанавӣ консерти идона бо иштироки ҳунармандони шинохтаи ҷумҳурӣ ва ансамбли «Сипар»-и Вазорати корҳои дохилӣ баргузор гардид. Ҳунармандон бо рақсу сурудҳои ҷаззоб  ба ҳозирин ғизои маънавӣ бахшиданд.
Дар хотимаи ҷаласаи идона арзи сипоси вазири корҳои дохилии Ҷумҳурии Тоҷикистон  Раҳимзода Рамазон Ҳамро аз номи ҳайати шахсии мақомоти корҳои дохилӣ ба Президенти Ҷумҳурии Тоҷикистон Эмомалӣ Раҳмон иброз гардид ва он бо  суханони зерини дастаҷамъонаи ҳайати шахсии мақомоти корҳои дохилӣ хотима ёфт:
Ҳама сар ба сар тан ба куштан диҳем,
Аз он беҳ, ки кишвар ба душман диҳем!