Раисони кумитаҳои замин аз курси такмили ихтисос гузаштанд

Душанбе, 25.11.2015.(АМИТ «Ховар»).-Дар  Донишкадаи идоракунии давлатии назди Президенти Ҷумҳурии Тоҷикистон курси такмили ихтисос, ки дар мавзӯи «Идоракунии замин: ҳолат ва дурнамо» муддати як ҳафта идома дошт, ба анҷом расид. Курси мазкур барои раисони кумитаҳои идораи замини вилоятҳои Бадахшон, Суғду Хатлон, шаҳри Душанбе ва навоҳии тобеи марказ созмон дода шуд. 
Тибқи нақша ба шунавандагон доир ба   заминаҳои ҳуқуқии хизмати давлатӣ дар Ҷумҳурии Тоҷикистон, механизми идораи замин дар шароити муосир, назорати давлатии истифода ва ҳифзи замин, ислоҳоти замин: ҳолат ва дурнамо, таҳия ва амалисозии сиёсати давлатӣ оид ба идораи замин, баҳои замин дар Ҷумҳурии Тоҷикистон, сиёсати давлатии Ҷумҳурии Тоҷикистон дар соҳаи кишоварзӣ машғулият гузаронида шуд. Дар фарҷом ректори Донишкадаи идоракунии давлатии назди Президенти Ҷумҳурии Тоҷикистон — Лутфия Абдулхолиқзода ба тамоми шунавандагон «Гувоҳнома» ва нусхаи  электронии машғулиятҳои доиргаштаро тақдим намуд.