Раёсати қӯшунҳои дохилии ВКД аз дастгоҳи марказии вазорат хориҷ карда мешавад

Душанбе, 25.11.2015.(АМИТ «Ховар»).-  Раёсати қӯшунҳои дохилии Вазорати корҳои дохилии кишвар аз сохтори дастгоҳи марказии ВКД хориҷ карда шуда, он ба нақшаи идораи ҳамин мақомот ворид  мешавад. Вобаста ба ин 25 ноябр вакилони палатаи поёнии Парлумони мамлакат ба лоиҳаи Қонуни Ҷумҳурии Тоҷикистон «Дар бораи  қӯшунҳои дохилии Вазорати корҳои дохилии Ҷумҳурии  Тоҷикистон» тағйирот ворид намуданд.  Искандар Солеҳзода -муовини вазири корҳои дохилии кишвар дар назди вакилони Парлумони мамлакат гуфт, ки ворид намудани тағйирот ба лоиҳаи Қонуни Ҷумҳурии Тоҷикистон «Дар бораи қӯшунҳои дохилии Вазорати корҳои дохилии Ҷумҳурии Тоҷикистон» бо мақсади мутобиқ намудани он ба талаботи қонунҳои Ҷумҳурии Тоҷикистон «Дар бораи милитсия» ва  «Дар бораи санадҳои меъёрию ҳуқуқӣ», инчунин бартараф намудани  калимаю ибораҳои ғайрирасмӣ ва  таззодҳои луғавӣ мебошад. Лоиҳаи қонуни мазкур барои баланд бардоштани мақоми қӯшунҳои дохилӣ, такмили сохтори он, ҳолати  омодабоши сарбозону афсарон ва вазъи иҷтимоии онҳо равона шудааст.