Шиносоии ҳайати парлумони Аврупо бо кори Маркази таълимии АНМН

Душанбе, 09.11.15. (АМИТ «Ховар»). — Ҳайати  парлумони Аврупо  бо  роҳбарии  Ивета Григуле, ки  ба  шаҳри  Душанбе  ташриф овардааст, аз Маркази  таълимии  Агентии  назорати  маводи  нашъаовари назди  Президенти  ҶТ ва  маркази сагпарварӣ  боздид  намуд. Маркази  мазкур дар  доираи Барномаи  рушди  СММ дар  Тоҷикистон  ташкил  ёфтааст.
Тавре  ки  Агентии  назорати  маводи  нашъаовари  ҶТ  хабар  медиҳад,  меҳмонон  бо  кори маркази таълимӣ  шинос  шуданд. Дар  маркази  мазкур  беш  аз  200  нафар  кормандони  мақомоти  ҳифзи  ҳуқуқ  ва  сохторҳои  қудратии  нафақат  Тоҷикистон,  балки  мутахассисони  бахши  сагпарварии Қирғизистону  Афғонистон  низ  таълим  мегиранд. 
Ёдовар мешавем, ки  марказ моҳи  июни  соли  2012  бо  дастгирии барномаи Иттиҳоди  Аврупо  оид ба  мусоидат  ба  идораи  сарҳадоти  Осиёи  Марказӣ таъсис  ёфта буд.
Зикр  шуд, ки  ташкили Маркази таълимӣ  барои тарбияи  сагпарварон  ва парвариши  сагҳои  хидматӣ ҷиҳати пайдо намудани  маводи  мухаддир ба афзоиши  самараи  фаъолияти  фаврию  ҷустуҷӯии ҳам  агентӣ  ва  ҳам  мақомоти  дигари  ҳифзи  ҳуқуқ ва  сохторҳои  қудратии  Тоҷикистону  Афғонистон  мусоидат  мекунад.
Алҳол  дар Маркази таълимии Агентии   назорати  маводи  нашъаовар  курсҳои  таълимии кормандони Сарраёсати қӯшунҳои  сарҳадӣ,  Кумитаи давлатии  амнияти  миллӣ, Вазорати  корҳои дохилӣ ва Хадамоти  гумруки  назди Ҳукумати  ҶТ  идома доранд.