Соли оянда дар Душанбе Форуми байнипарлумонии Тоҷикистону Русия доир мегардад

Душанбе, 13.11.2015.(АМИТ «Ховар»).- Интизор меравад, ки соли 2016 дар Душанбе Форуми навбатии байнипарлумонии Тоҷикистону Русия: неруи ҳамкории байниминтақавӣ баргузор гардад. Масъалаи мазкур дар ҷараёни мулоқоти Маҳмадсаид Убайдуллоев-раиси Маҷлиси миллии Маҷлиси Олии ҷумҳурӣ бо ҳайати парлумонии Русия таҳти сарварии Евгений Бушмин -муовини раиси Шӯрои Федератсияи Маҷлиси Федералии Федератсияи Русия дар Душанбе матраҳ гардид.
Мусоҳибон дар мулоқот масоили марбут ба густариши равобити байнипарлумонӣ ва таҳкими заминаҳои ҳамкории иқтисодию тиҷоратии байни минтақаҳои Русия ва шаҳру вилоятҳои Тоҷикистонро баррасӣ карданд.  Бояд зикр кард, ки Форуми байнипарлумонии Тоҷикистону Русия: неруи ҳамкории байниминтақавӣ ҳамчун институти нави муносибатҳои байнипарлумонӣ миёни Маҷлиси миллии Маҷлиси Олии Ҷумҳурии Тоҷикистон ва Шӯрои Федератсияи Маҷлиси Федералии Федератсияи Русия аз соли 2006-ум ин ҷониб баргузор гардида, рисолати худро дар самти рушди муносибатҳои ҳасанаи байнипарлумонӣ иҷро менамояд. Форуми мазкур соли гузашта дар шаҳр ва вилояти Маскави Русия доир гардид.