Созмони гурӯҳи корӣ барои тартиб додани меъёрҳои миллӣ оид ба пешгирии нашъамандӣ

Душанбе, 10.11.2015. (АМИТ «Ховар).-Аз 4 то 6 ноябр дар Агентии назорати маводи нашъаовари кишвар (АНМН) оид ба маводи нашъаовар ва ҷинояткорӣ семинари миллии “Стратегияи пешгирии нашъамандӣ ва таҳиягарони сиёсат” бо ибтикори АНМН ва Раёсати минтақавии СММ ташкил гардид.
Дар семинар намояндагони созмонҳои давлатӣ, байналмилалӣ ва ҷамъиятӣ, ки бо фаъолияти пешгирӣ ва коҳиш додани зарари нашъамандӣ машғул мебошанд, иштирок намуданд.
Барои гузаронидани семинари миллӣ коршиноси байналмилалӣ Ангелина Бразерхуд-машваратчии Раёсати СММ оид ба маводи нашъаовар ва ҷинояткорӣ даъват шуд, ки бо масоили иҷтимоӣ ва тадқиқот дар соҳаи тандурустии ҷамъиятӣ машғул мебошад.
Кори семинар ба коркарди мудохилаи самаранок дар соҳаи пешгирии нашъамандӣ ва истеъмоли маводи психоактивӣ, инчунин рафтори хавфнок равона гардид. Ба иштирокчиёни семинар иттилоот дар бораи таҷрибаи ҷаҳонии пешгирии нашъамандӣ ва меъёрҳои баҳогузории чорабиниҳои пешгирикунанда пешниҳод шуданд.
Дар семинар иштирокдорон роҳҳои пурзӯр намудани иқтидор дар соҳаи ҷамъоварии мавод, баҳогузорӣ ва ҳамоҳанг сохтани ҳамкорӣ дар соҳаи пешгириро муҳокима намуданд.
Аз рӯи пешниҳодҳои иштирокдорон нақша тартиб дода шуд, ки тибқи он гурӯҳи корӣ барои тартиб додани меъёрҳои миллии пешгирии нашъамандӣ дар чорчӯбаи стратегия ва барномаҳои пешгирии истеъмоли маводи нашъаовар созмон дода мешавад.