Суғд: Марказҳои фарогирии ҷавонон фаъол мегарданд

Душанбе, 20.11.2015. (АМИТ “Ховар”). — Бо ибтикори Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон 18 ноябри соли ҷорӣ дар шаҳри Хуҷанд оид ба таъсис ва рушди фаъолияти марказҳои ҷавонон бо иштироки мудирони бахши ҷавонон, варзиш ва сайёҳӣ ва мудирони бахши робита бо ҷомеаи мақомоти иҷроияи маҳаллии шаҳру ноҳияҳои вилояти Суғд семинари ҷумҳуриявии методӣ — амалӣ баргузор гардид.  Дар он муовини раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Амирбекзода Ҳабибулло  оид ба зарурати ташкили марказҳои ҷавонон дар шароити имрӯзаи ҷомеа ва нақши он дар татбиқи сиёсати давлатии ҷавонон изҳори андеша кард. Дар семинар доир ба заминаҳои меъёрӣ — ҳуқуқии таъсиси марказҳои ҷавонон директори КВД “Маркази ҷумҳуриявии иттилоот ва тамоюли ҷавонон” Зубайдулло Маҳмадуллоев ба иштирокдорон доир ба устувории фаъолияти марказҳои ҷавонон дастурҳои муфид дода, таваҷҷуҳи иштирокдоронро ба самти фарогирии ҷавонон ба тарзи ҳаёти солим, аз худ намудани донишҳои муосири технологӣ ва худинкишофдиҳии ҷавонон дар шароити фаъолияти марказҳои ҷавонон ҷалб намуд.