Сумангул Тағойзода: Камбудиҳоро бемасъулиятии масъулон ба бор овардааст

Душанбе, 23.11.2015. (АМИТ «Ховар») — Дар шаҳри Қурғонтеппа   вохӯрии   намояндагони Раёсати Агентии меҳнат ва шуғли аҳолӣ, Раёсати Хадамоти муҳоҷират, директорони литсейҳои касбии техникӣ аз шаҳру навоҳии вилояти Хатлон бо иштироки    Тағойзода  Сумангул Саид, вазири меҳнат, муҳоҷират ва шуғли аҳолии Тоҷикистон баргузор гардид. Дар машварат   фаъолияти сохторҳои вазорат дар вилояти Хатлон   мавриди таҳлилу баррасӣ қарор гирифта,   масъулин оид ба камбудиву норасоӣ ва  мушкилоти ҷойдошта ҳисобот доданд.
Тағойзода Сумангул Саид гуфт, ки : «Мутаассифона, дар вилояти Хатлон дар аксари  ҷойҳои корӣ шаҳрвандон ғайрирасмӣ фаъолият дошта, ба қайд гирифта нашудаанд. Инчунин ҳолатҳои  сари вақт пардохт нагардидани музди меҳнати кормандон,  аз ҷумла, қарздории нисбатан калони музди меҳнат дар ноҳияи Ёвон (1 млн. 69, 6 ҳазор сомонӣ), Қубодиён (540, 2 ҳазор), Сарбанд (317, 4 ҳазор), Хуросон (195 ҳазор сомонӣ), Кӯлоб (180, 9 ҳазор), Қӯрғонтеппа (175, 3 ҳазор), Вахш (170, 5 ҳазор), Панҷ (168, 9 ҳазор), Фархор (146, 8 ҳазор), Ҳамадонӣ (49,2 ҳазор сомонӣ) ба қайд гирифта шудааст. Қарзҳои мавҷудаи музди меҳнат,  хусусан дар соҳаи буҷетӣ, асосан ба соли 2015 рост меоянд, ки он 607, 5 ҳазор сомониро ташкил медиҳад.
Дар самти иҷрои нақшаҳои муҳоҷирати дохилию экологӣ низ дар вилоят норасоиҳо вуҷуд дошта, беҳбудиро тақозо менамоянд. Дар солҳои 2013-2015 дар давоми соли 2015 ба ноҳияи Хуросон аз ноҳияҳои Айнӣ 50, Кӯҳистони Мастчоҳ 10  ва дар ҳудуди ноҳия 60 оила, дар маҷмӯъ 120 оила кӯчонида шудаанд. Аз ноҳияи Бохтар  72 оила ба ноҳияи Ҷиликӯл кӯчонида шудааст. Ба ҳар яке аз ин оилаҳо ба андозаи 3000 сомонӣ қарзи имтиёзнок пардохт шудааст. 
  Вазир  ҳамчунин аз  самаранок истифода набурдани заминҳои таҷрибавӣ, техникаҳои дар ихтиёрдошта,  муаррифӣ ва ба талаботи бозори меҳнат  мутобиқ нагардонидани ихтисосҳо, таъмиру тармими биноҳо ва хобгоҳҳои муассисаҳои таҳсилоти касбӣ  интиқод карда, аз бемасъулиятии роҳбарони муассисаҳои таълимӣ изҳори нигаронӣ намуд.