Таҷлили Рӯзи милитсия дар «Кохи Ваҳдат»

Душанбе, 10.11.2015. (АМИТ «Ховар).- Ин лаҳзаҳо дар Маҷмааи давлатии «Кохи Ваҳдат» иди касбии кормандони Вазорати корҳои дохилӣ- Рӯзи милитсия бо иштироки роҳбарони вазорату идораҳои мамлакат ботантана ҷараён дорад.
Давлату Ҳукумати кишвар  барои  таҳкими асосҳои моддиву техникии ин сохтори бонуфуз, ба хизмат ҷалб кардани кормандони баландихтисос, беҳтар намудани шароити зиндагӣ ва хизмати ҳайати шахсии Вазорати корҳои дохилӣ таваҷҷуҳи мунтазам зоҳир менамояд.
Тавре ки ба ҳама маълум аст, соҳибистиқлолии Ватани маҳбубамон барои мо сарвати гаронбаҳотарин маҳсуб мешавад, зеро он таҷассумгари орзуву умеди чандинасраи халқи тоҷик мебошад.
Зикр кардан зарур аст, ки кормандони милитсия барои  барқарорсозии сохти конститутсионӣ, таъмини оромиву суботи сиёсӣ, тартиботи ҷамъиятӣ, ҳуқуқу озодиҳои инсон ва шаҳрванд аз лаҳзаҳои нахустини соҳибистиқлолии кишвар дар сафи пеши мубориза бар зидди гурӯҳҳои террористиву экстремистӣ, ҷинояткории муташаккили фаромиллӣ ва муомилоти ғайриқонунии маводи мухаддир шуҷоатмандиву далерӣ ва фидокориву ҷоннисорӣ нишон дода, дар таҳкими нуфузу эътибори давлати мо дар арсаи ҷаҳон саҳми арзанда гузоштаанд.
Дар хатми чорабинӣ як зумра кормандони пешқадами ин ниҳод барои корнамоӣ ва садоқатмандона иҷро намудани вазифаи хизматӣ бо ифтихорномаҳо ва рутбаҳо сарфароз мегарданд.
Дар ҷамъомад барномаи фароғатӣ аз ҷониби ҳунармандони шинохтаи кишвар ва гурӯҳи ҳунарии «Сипар»-и назди ВКД пешкаши аҳли нишаст мегардад.