Зафаробод: Чорабинӣ доир ба пешгирии шомилшавии ҷавонон ба ҳизбу ҳаракатҳои террористӣ

Зафаробод, 19.11.2015. (АМИТ «Ховар»).- «Пешгирии шомилшавии ҷавонон ба ҳизбу ҳаракатҳои террористиву ифротгароӣ»- чунин унвон дошт чорабиние, ки аз ҷониби кумитаи иҷроияи Ҳизби Халқии Демократии Тоҷикистон дар ноҳияи Зафаробод бо иштироки донишҷӯёни Коллеҷи политехникии ноҳия доир гардид. Дар вохӯри  150  донишҷӯю омӯзгорони муассисаи номбурда ширкат намуданд. 
Тавре ки ба АМИТ “Ховар” аз мақомоти маҳаллии ноҳия хабар доданд, намояндагони кумитаи ҲХДТ дар ноҳия аз пайвастани ҷавонони кишвар ба ташкилоти террористии ба ном «Давлати исломӣ» ва шомилшавии ҷавонон ба ҳар гуна ҳизбҳои тундрави террористиву ифротгароӣ мисолҳои равшан оварда,  оид ба хатари он ба ҷомеаи ҷаҳонӣ ёдовар шуданд. 
Ҳамзамон оид ба сабаб ва омилҳои баста шудани Ҳизби наҳзати исломии Тоҷикистон ва воқеаҳои 4-уми сентябри соли равон, ки дар пойтахти кишвар рух доданд, ба аҳли нишаст маълумоти муфассал доданд.