Дар муассисаҳои таълимӣ зиёфатороиву туҳфаситонӣ ва ҷамъоварии маблағ дар Соли нав қатъиян манъ аст

Душанбе, 21.12.2015 (АМИТ «Ховар»).-Буридани  арча ва гузоштани ягон намуди арча, истифодаи ҳама гуна маводи пиротехникӣ, зиёфатороиву туҳфаситонӣ, ҷамъоварии маблағ,  сайру гашт ва дар тарабхонаҳо ташкил намудани чорабиниҳои солинавӣ  дар муассисаҳои таълимӣ қатъиян манъ аст.
 Ин дастур  аз ҷониби Вазорати маориф ва илми ҶТ дар иртибот ба фарорасии Соли нави мелодӣ дода шудааст. Аз ҷумла, дар муассисаҳои таълимии ҷумҳурӣ аз 25 то 31 декабр ва 1 январи соли 2016 аз ҷумлаи шахсони масъул навбатдорӣ бояд ташкил гардида,  оид ба масъалаи амнияти шаҳрвандон, тартиботи ҷамъиятии зиддисӯхтор дар муассисаҳо чораҷӯӣ карда, дар мавриди таҷлили ин ҷашн аз ҷониби хонандагон ва омӯзгорон тадбирҳои таъхирнопазир андешида шаванд. 
Вазорати маориф ва илми ҷумҳурӣ тавсия додааст,  ки ҳангоми гузаронидани чорабинии солинавӣ таҳияи рӯзномаи деворӣ, баргузории маҳфилҳои адабӣ, фарҳангӣ ва бозиҳои варзишӣ ба роҳ монда шавад.