Дастаи мунтахаби Тоҷикистон Ҷоми Иттиҳод — 2016 — ро бо вохӯрӣ бо дастаи мунтахаби Русия оғоз менамояд

Душанбе, 24.12.15. (АМИТ «Ховар»). — Ҷадвали  бозиҳои  мусобиқоти  анъанавии  байналмилалӣ  барои  дарёфти Ҷоми Иттиҳод — 2016  маълум  гардид. Ин  мусобиқот, ки дар  он  ҳашт   дастаи  мунтахаби ҷавонон  иштирок  менамоянд, аз  17  то  23  январ  дар   шаҳри  Санкт — Петербург  баргузор мешавад. 
Дастаи  мунтахаби ҷавонони  Тоҷикистон  аз  рӯи  натиҷаи  қуръапартоӣ  ба гурӯҳи  «В» ворид  шуд, ки дар  он  дастаҳои  Латвия,  Эстония  ва  Русия  ҳарифонаш  ба  шумор  мераванд. Дар  гурӯҳи  «А»  дастаҳои  Беларус,  Қирғизистон,  Қазоқистон  ва  Молдова қувваозмоӣ  мекунанд.
Дастаи  мунтахаби  кишвар  17  январ бо  дастаи  мунтахаби   Русия,  19  январ бо  дастаи  Эстония ва  21  январ  бо  дастаи  мунтахаби  ҷавонони Латвия  қувваозмоӣ  менамояд. Ҳамаи бозиҳо дар  варзишгоҳи «Петербургский»  баргузор  мешаванд. 
Мувофиқи тартиботи Ҷоми  Иттиҳод — 2016  ғолибони  гурӯҳҳо  дар вохӯрии  ниҳоӣ  иштирок  менамоянд. Дастаҳое, ки  дар  гурӯҳҳои  худ ҷойҳои  дуюмро  ишғол  мекунанд,  барои  ба даст овардани  медалҳои  нуқра  қувваозмоӣ  менамоянд. Дастаҳое, ки  дар  гурӯҳҳо  ҷойҳои  сеюмро  касб  мекунанд, барои  дарёфти  мақоми  панҷум  бо  ҳам  вомехӯранд. 
Маросими  ботантанаи  ифтитоҳи  мусобиқот  17  январ  ва хатми он 23  январ  сурат  мегирад.