«Маърифати хонавода ва тарбияи фарзанд»-конфронс

Душанбе, 22.12.2015 (АМИТ «Ховар»).-Бахшида ба Соли оила бо ташаббуси Академияи таҳсилоти Тоҷикистон ва Раёсати маорифи вилояти Суғд дар гимназияи рақами 2-и ноҳияи Бобоҷон Ғафуров конфронси илмӣ-амалӣ  дар мавзӯи «Маърифати хонавода ва тарбияи фарзанд» баргузор гардид. Академик Маҳмадулло Лутфуллоев дар мавзӯи «Ҳикмати сутунҳои хонавода», академик Қодир Қодиров дар мавзӯи «Мулоҳизае чанд перомуни вожаҳои «оила» ва «хонавода», Султонмурод Тӯронов, мудири шуъбаи илм ва инноватсияи Пажӯҳишгоҳи рушди маорифи Тоҷикистон дар мавзӯи «Хонавода ва тарбияи ватандорию ифтихори миллӣ» маърӯзаи илмӣ карданд. Ҳамчунин як гурӯҳ олимони варзида аз Донишгоҳи давлатии Хуҷанд дар мавзӯи фарҳанги оиладорӣ сухан гуфтанд. 
Дар фарҷом миёни олимон ва омӯзгорон дар мавзӯи оилаву оиладорӣ мубодилаи афкор сурат гирифт.