Мулоқоти Сироҷидин Аслов бо Муҳаммад ас-Сувайдӣ

Душанбе, 21.12.2015 (АМИТ «Ховар»).- Вазири корҳои хориҷии Ҷумҳурии Тоҷикистон Сироҷидин Аслов дар доираи сафари расмии худ ба Давлати Амороти Муттаҳидаи Араб 19 декабр бо директор генералии Фонди Абӯ Забӣ оид ба рушд Муҳаммад ас-Сувайдӣ мулоқот анҷом дод.
Зимни мулоқот масъалаҳои ҳамкорӣ миёни Тоҷикистон ва муассисаҳои молиявии арабӣ, аз ҷумла Фонди Абӯ Забӣ оид ба рушд мавриди баррасӣ қарор гирифтанд. Бо изҳори қаноатмандӣ аз робитаҳои неки сиёсӣ байни Тоҷикистон ва Амороти Муттаҳидаи Араб ҷонибҳо таъкид намуданд, ки барои роҳандозии ҳамкории муассир дар татбиқи лоиҳаҳои зербиноӣ дар бахҳшои энергетика, саноат ва кишоварзӣ иқдомоти лозима анҷом хоҳанд дод.
Ҷонибҳо инчунин масъалаҳо роҷеъ ба мусоидати Фонди Абӯ Забӣ оид ба рушд дар бартарафсозии пайомадҳои нохуши заминларзаи рӯзи 7 декабри соли ҷорӣ дар Тоҷикистонро баррасӣ намуданд.