Мушкилот ва ояндаи муносибатҳои Тоҷикистону Ҳиндустон мавриди баррасӣ қарор мегирад

Душанбе, 21.12.2015 (АМИТ «Ховар»). — Имрӯз дар Душанбе бо ташаббуси Донишгоҳи миллии Тоҷикистон, Донишгоҳи ба номи Ҷавоҳирлаъл Нерӯ ва Хазинаи тадқиқот ва фарҳанги Ҳимолой конфронси байналмилалӣ дар мавзӯи «Омӯзиши Ҳиндустон дар Тоҷикистон» ба кори худ шурӯъ кард. Дар конфронс ректори Донишгоҳи миллии Тоҷикистон М. Имомзода, сафири навтаъйини Ҳиндустон дар Тоҷикистон Бирадҷ Прасад, роҳбари Хазинаи тадқиқот ва фарҳанги Ҳимолой ва Маркази тадқиқоти дохилиосиёӣ профессор Варику, доншмандону олимони ватаниву хориҷӣ, ҳамчунин донишҷӯён иштирок карданд. Дар назар дошта шудааст, ки конфронс рӯзҳои 21-22-юми декабр дома ёфта, дар ҷараёни он масъалаҳои ҳамкории Тоҷикистону Ҳиндустон дар бахшҳои сиёсӣ, иқтисодӣ, фарҳангӣ, таъсири мутақобилаи адибони тоҷику ҳинд дар эҷоди асарҳои классикӣ ва дигар паҳлӯҳои ҳамкории ду миллат ва ду давлат мавриди муҳокима қарор дода мешаванд.
Алоқаҳои байналмилалии нақлиётӣ, эҳтимоли ҳамкории бонкӣ миёни Тоҷикистону Ҳиндустон, мушкилот ва ояндаи муносибатҳои тиҷоративу иқтисодии Тоҷикистону Ҳиндустон, муқоисаи нисбии раванди муҳоҷирати меҳнатӣ дар Тоҷикистону Ҳиндустон аз мавзӯъҳои ҷолиби конфронси байналмилалианд, ки аз ҷониби иштирокдорон хуб пазируфта хоҳанд шуд.