Русия барои поён додани бӯҳрони муносибатҳояш бо Туркия се шарт гузоштааст

Душанбе, 15.12.2015. (АМИТ «Ховар) —  Андрей Карлов, сафири Русия дар Туркия  14-уми  декабр эълон намудааст, ки   Ҳукумати Русия барои раҳоӣ аз бӯҳрони муносибатҳо бо Туркия баъди аз  ҷониби Туркия сарозер кардани ҳавопаймои низомии СУ-24 се шарт гузоштааст.
Карлов дар мусоҳиба бо рӯзномаи «Ҷумҳурият»-и  Туркия гуфт: Шарти нахуст  узрхоҳии  ҷониби Ҳукумати Туркия барои сарозер кардани  ҳавопаймои низомии  Русия аст, ки  24-уми ноябр рух дод.
Сафир афзуд, ки дар ҳолати дуюм-  ин пайдо кардани гунаҳкорон ва ба маҳкама кашидани онҳо мебошад.
Шарти охир ин аст, ки Туркия бояд дар ивази зарари  овардаи худ бар асари ин фоҷиа ба Русия ҷубронпулӣ  пардохт намояд.
Гуфта мешавад, ки раиси ҷумҳурии Туркия Реҷеп Тайип Эрдуғон то ҳол барои ҳодисаи  суқути ҳавопаймои низомии Русия  узрхоҳӣ накардааст. Ва ин дар ҳолест, ки  Аҳмад  Довудуғлу, нахуствазири Туркия таъкид кардааст, ки  Туркия ҳаргиз бахшиш нахоҳад пурсид,  зеро ки ин ҳодиса  ба хотири ҳифзи ҳудуди кишвар рух додааст.