Сатҳи таваррум дар интиҳои соли 2016 7 фоизро ташкил хоҳад дод

Душанбе, 3.12.2015. (АМИТ «Ховар»).- “Бо  назардошти қавӣ гардидани қурби асъори хориҷӣ, болоравии нархи маҳсулоти истеъмолии воридотӣ, ба монанди орд, равғани растанӣ ва маска, шакар, маводи шустушӯӣ, доруворӣ ва дигарҳо, ки қариб 65 фоизи сабади истеъмолиро дарбар мегиранд, дида шуд. Саҳми болоравии нархи молҳои воридотӣ 75,6 фоиз ё худ 3,1 банди фоизии таварруми ҳосилшударо ташкил намуд”-зикр дошт  раиси Бонки миллии Тоҷикистон Ҷамшед  Нурмаҳмадзода 2 декабр дар ҷаласаи Маҷлиси намояндагони Маҷлиси Олии Ҷумҳурии Тоҷикистон.
Аз рӯи ҷамъбасти соли ҷорӣ сатҳи таваррум дар доираи 5,5 фоиз нигоҳ дошта хоҳад шуд, ки ин нисбат ба меъёри пешбинишуда дар “Дурнамои сиёсати пулию қарзии ҶТ дар соли 2015” 2 банди фоизӣ камтар мебошад.
Дар соли оянда низ барои дар сатҳи муътадил нигоҳ доштани таваррум бо назардошти татбиқи сиёсати устувори монетарӣ ва фискалӣ тамоми тадбирҳои зарурӣ андешида шуда, онҳо барои ноил гардидан ба муътадилии сатҳи нархҳои дохилӣ, истифодаи самараноки воситаҳои сиёсати пулию қарзӣ ва асъорӣ, зиёд нагардидани ҳаҷми пул дар муомилот равона мегарданд.
“Вобаста ба ин, пешбинӣ мешавад, ки дар интиҳои соли 2016, бо назардошти таъсири омилҳои мавсимӣ ва маъмурӣ, сатҳи таваррум то 7,0 фоизро ташкил диҳад”-,илова намуд Ҷамшед  Нурмаҳмадзода.