Қӯшунҳои Ироқ Рамадиро аз силоҳбадастони «Давлати исломӣ» зада гирифтанд

Душанбе, 28.12.15. (АМИТ «Ховар»). — Қӯшунҳои  Ироқ рӯзи  якшанбеи  гузашта  собиқ  маҷмааи  ҳукуматӣ   воқеъ  дар  Рамадиро, ки   дар  ихтиёри   дастаҳои  «Давлати  исломӣ»  қарор  дошт,  ишғол  намуданд,  хабар  медиҳад  агентии  Рейтер   зимни  истинод ба  низомиёни Ироқ.
Маҷмааи  мазкур такягоҳи  охирини   силоҳбадастогни  ДИ  дар  Рамади  ба  шмор мерафт. Шаҳри  Рамади  дар  90  — километрии Бағдод  воқеъ  буда, аҳолии онро арабҳои суннимазҳаб  ташкил  медиҳанд. Мувофиқи  баъзе  маълумот,  силоҳбадастони  ДИ аз  шаҳр ба  самти   шимолу  шарқӣ рӯ ба  гурез  оварданд. 
Амалиёти  ҳарбӣ барои  ба даст овардани   шаҳри  Рамади аввалҳои  моҳи  ноябр  оғоз  ёфта, вале суст   сурат мегирифт,   зеро  ҳукумат  аз бархурди ҷамоаҳои  миллӣ бо  аҳолии суннии  шаҳр  хавф  бурда,  тасмим  гирифт, ки  ихтиёриёни мазҳаби шиаро, ки Тикрит бо  ёрии  онҳо  ишғол  карда шуд, истифода  набарад.