Таътили зимистона дар муассисаҳои таълимӣ аз 1 январ оғоз мегардад

Душанбе, 23.12.2015 (АМИТ «Ховар»).- Тибқи фармоиши Вазорати маориф ва илми ҶТ аз 1 то 31 январи соли 2016 барои хонандагони муассисаҳои  таҳсилоти умумӣ сарфи назар аз шакли ташкилию ҳуқуқӣ таътили зимистона эълон шудааст. 
Бо мақсади самаранок истифода намудани вақти таътил пешниҳод гардидааст, ки барои хонандагоне, ки дар озмунҳои фаннӣ иштирок мекунанд, дар муассисаҳои таълимӣ дарсҳои иловагӣ ташкил  мешаванд. Бо мақсади ҷалби хонандагон ба хониши китобҳои бадеӣ ба масъулин дастур дода шуд, ки  рӯйхати адабиёти бадеиро вобаста ба синни мактаббачагон таҳия намуда,  роҳҳои ҳавасмандгардониро барои дар таътили зимистона фпро гирифтани хонандагон бо  мутолиаи бештари китобҳои бадеӣ дарёфт намоянд. 
Аз ҷумла, дар моҳи январ, яъне зимни таътили хонандагон,  тибқи фармоиши вазорат бо омӯзгорон вобаста ба самти фаъолияташон семинар ва курсҳои омӯзишӣ бояд доир  шаванд.  
Бо мақсади ҷалби падару модарон ба мактаб ва тарбияи фарзанд дар таътили зимистона роҳбарони синфҳо ва муовинони директор оид ба таълим дар мавриди «Омилҳои асосии ба ҷиноят ва ҳуқуқвайронкунӣ даст задани  наврасон ва роҳҳои пешгирии он»  бо падару модарон суҳбатҳо мегузаронанд.