В. Наудужас: «Тоҷикистон бо ҷолибият ва дурнамояш моро дар ҳайрат мегузорад»

Душанбе, 11.12.2015. (АМИТ «Ховар»). «Тоҷикистону Литваро таърих ва дӯстии миёни мардумонамон бо ҳам мепайвандад», — гуфт сафири Литва дар Тоҷикистон Витаутас Наудужас пас аз мулоқот бо Президенти Ҷумҳурии Тоҷикистон Эмомалӣ Раҳмон. 
Дакр идомаи андешаронӣ ӯ таъкид намуд, ки асри XX — асри рушд ва самаранокӣ аст, ки дар он мардуми тоҷик ба муваффақияти назаррас ноил гашт. «Соли 2009 Президенти Ҷумҳурии Тоҷикистон Эмомалӣ Раҳмон ба Литва ташриф овард ва дар навбати худ вазири корҳои хориҷии мо низ аз шаҳри Душанбе дидан кард. Тоҷикистон бо ҷолибият, дурнамо ва мардуми некаш моро дар ҳайрат мегузорад. Илова бар ин, Тоҷикистон дорои табиати зебои тавсифнашаванда мебошад. Дар тамоми ҷаҳон шоирон ва донишмандони тоҷик, ба мисли Рӯдакӣ, Фирдавсӣ, Саъдӣ, Умари Хайём, Абӯалӣ  Ибни Сино ва дигарон маълуму машҳур мебошанд».
 Ёдовар мешавем, ки дирӯз Президенти Ҷумҳурии Тоҷикистон Эмомалӣ Раҳмон аз сафирони як зумра кишварҳои Аврупо, Осиё ва Африқо эътимоднома қабул намуд.